मुंबई : मुंबई मराठी पत्रकार संघाने दर वर्षीप्रमाणे याही वर्षी दिवाळी अंकांचे भव्य प्रदर्शन ११ नोव्हेंबर ते १६ नोव्हेंबर २०१९ या कालावधीत आयोजित केले आहे.
ज्येष्ठ पत्रकार मधुकर भावे यांच्या ११ नोव्हेंबर रोजी सायंकाळी पाच वाजता मुंबईतील आझाद मैदान परिसरातील पत्रकार भवनात प्रदर्शनाचे उद्घाटन होईल. यात विविध विषयांना वाहिलेले वाचनीय दिवाळी अंक वाचकांना पाहावयास मिळतील.
गत वर्षीप्रमाणे या वर्षीदेखील मुंबई मराठी पत्रकार संघ आपल्या सदस्यांना ५० टक्के सवलतीच्या दरात दिवाळी अंक उपलब्ध करून देणार आहे. हे प्रदर्शन सर्वांसाठी खुले असून, साहित्यप्रेमींनी त्याचा लाभ घ्यावा, असे आवाहन मुंबई मराठी पत्रकार संघाच्या वतीने करण्यात आले आहे. सकाळी ११.०० ते रात्री आठ या वेळेत हे प्रदर्शन विनामूल्य पाहता येईल.
महाराष्ट्रात दिवाळी अंकांची गौरवशाली परंपरा असून, ती जतन करण्याचे काम मुंबई मराठी पत्रकार संघ वर्षानुवर्षे करीत आला आहे, अशा शब्दांत अनेक मान्यवरांनी पत्रकार संघाला वेळोवेळी गौरविले आहे.